چیف سیکرٹری سندھ میجر (ریٹائرڈ) اعظم سلیمان خان کی جانب سے مون سون بارشوں کے حوالے سے بلائی گئی اعلی سطحی میٹنگ میں چیئرمین بلدیہ کورنگی سید نیئر رضا کی شرکت ۔

اجلاس میں ڈسٹرکٹ میونسپل کارپوریشنز کے چیئرمین ،میونسپل کمشنر ز کنٹونمنٹ بورڈ کے چیئرمین اور سندھ حکومت کے اعلیٰ افسران نے شرکت کی۔

اجلاس میں کراچی میں نالوں کی صفائی کے حوالے سے اقدامات کا جائزہ لیا گیا ۔

چیئرمین بلدیہ کورنگی سید نیئر رضا نے توجہ دلائی کہ نالوں کی صفائی کے حوالے سے سندھ حکومت کی جانب سے ایک کروڑ کا اعلان اونٹ کے منہ میں زیرے کے مترادف ہے ۔اس سے نالے کی صفائی تو کجا چوکنگ پوائنٹ بھی مکمل کلیئر نہیں ہو سکتے۔

صرف چوکنگ پوائنٹ کی بات کرلی جائے تو اس کی صفائی کیلئے بھی کم سے کم ڈیڑھ سے دو کروڑ روپے درکار ہیں۔

بلدیہ کورنگی کی حدود میں نالوں کی مکمل صفائی کے لئے تقریبا 42 کروڑ کی خطیر رقم درکار ہے ۔

بلدیہ کورنگی شدید مالی مشکلات کا شکار ہے ۔

سندھ گورنمنٹ کی جانب سے گزشتہ سال 15 فیصد تنخواہوں میں اضافے کے بعد سے اب تک بلدیہ کورنگی کو کوئی ادائیگی نہیں کی گئی ۔

سندھ حکومت پر بلدیہ کورنگی کے 50 سے 60 کروڑ روپے واجب الادا ہیں جس کی وجہ سے متعدد ترقیاتی اور غیر ترقیاتی امور ٹھپ ہیں ۔

اس سلسلے میں حکومت سندھ کو متعدد بار مراسلے بھیجے گئے لیکن کوئی خاطر خواہ جواب موصول نہ ہوا ۔

سندھ حکومت کی جانب سے آکٹرائے ضلع ٹیکس کی مد میں دی جانے والی رقم کا 70 فیصد اسٹیبلشمنٹ کی مد میں خرچ ہوجاتا ہے ۔

باقی ماندہ 30 فیصد رقم سے بلدیہ کے امور چلانے میں شدید دشواری کا سامنا ہے ۔

واٹر اور سیوریج لائنوں کی تنصیب اور مرمت کے حوالے سے بھی بلدیہ کورنگی نے اپنے فنڈ سے 70 فیصد کام کرائے ہیں جوکہ ایک اضافی بوجھ ہے ۔

واٹر کمیشن میں بھی ہماری جانب سے اس حوالے سے ایک مفصل رپورٹ جمع کرائی گئی ہے ۔

ہم سندھ حکومت سے درخواست کرتے ہیں کہ ہمارے واجبات فوری طور پر ادا کیے جائیں تاکہ بلدیہ کے معاملات احسن طریقے سے انجام دیے جا سکیں ۔